Dál čohkkájetne Jackson´s kaféas dáppe Uptownas ja čálle ohccamiid, ii nu guhkKin eret Bryant Avenue´s gos moai orro. Dáppe lea hui fiinnis leahkit ja oalle mihá báhkka. Lei lagábui 40 lieggagráda go seaivvuime Minneapolisa girdisadjái mánnodaga 26. beaivve. Lieggašohkka!
Dán radjai ledne earet eara ollen dudjot (ii sáhttan maidege eara bargat dán báhkkasis), fitnan veahaš šoppeme, čállán skuvlabargguid, fitnán boradeame resturáŋŋain, ikte fitnán geahččame sámi filmma - Sápmelaččat gos Veli-Pekka Lehtola doalai jearahallama ja debahta, ja dál aitto bohte sušibáras gos ledne návddašan njálgga sušii ja sake.
Ihttin lea plána fitnát baseballspealu geahččame! Dat šadda speantta! Lea go son dát speallu nu go filmmáin láve..?
Olbmot jerret maid moai ledne dáppe bargame. Moai ledne vuosttažettiin skuvlabargguid bargame - Marie lea mastera čállime ja mun lean lohkame iežan eksameniidda, muhto seammás ledne návddašeame eallima ja vásiheame eara guovllu ja kultuvrra go Sámi ja Norggá. Šadda miellagiddevaš oaidnit maid Minneapolis leaš buktiime ja čajeheame munnuide! Ledne juo gávdnan munno favorihttá rámbuvrraid ja kaféaid čihkkosis dáppe Uptownas ja oahpásnuvvan somás olbmuiguin!
Dan maid eai nu máŋggas Sámis soaite diehtit lea ahte dáppe gávdnojit sápmelaččat. Ámerihkalaš sápmelaččat - maŋisboahttit sápmelaččain geat 1800-1900-logus bohte Sámis deike Ámerihkii. Nu somá oaidnit ahte mii gávdnot miehtá máilmmii eat ge dušše sámis! Ja áiggun maid sin rámidit geat duođas beroštit sin duogažis ja barget doalahit sin sámi kultuvrra eallime nu bures go sáhttet, vaikko ii álo soaite lihka álki. Mii eat galgga olgguštit sin, muhto baicca rámidit ja inkluderet sin.
Lea vel okta ágga manne ledne juste deike vuolgán, muhto dat lea čiegusvuohta. Gal dan muitaledne go lea rievttes áigi ;)
Dál de lea bijadit ruoktot nohkkat, ihttin lea guhkes beaivi!
- Risten G!
